सप्तरी, ११ भदौ ।
बुधबार साँझ। घरमा सामान्य दिनझैँ थियो। तर केहीबेरमै सप्तरीको सुरुङ्गा नगरपालिका–७, बसानपट्टीको एउटा परिवारमा सन्नाटा छायो।
रसुवाको भोटेकोशीमा आएको भीषण बाढीको खबर फैलिएसँगै कमल रामको परिवारले नुवाकोटको त्रिशूली बजारमा रहेका छोरा दुर्गानन्द रामलाई फोन गर्न थाल्यो। पटक–पटक फोन गरे, तर उताबाट कुनै जवाफ आएन।
मनमा अनेक आशंका उब्जिरहेका थिए।
करिब साँझ ४ बजेतिर अचानक फोन आयो। तर त्यो फोन दुर्गानन्दकै मोबाइलबाट थिएन। साथीको मोबाइलबाट आएको थियो।
फोन उठाउँदा उताबाट दुर्गानन्दको रोदन सुनियो।
“म त बाँचेँ… तर श्रीमती र छोरालाई आँखै अगाडि बाढीले बगायो।”
त्यो आवाजले परिवारको मुटु नै चिरियो।
२१ वर्षीय दुर्गानन्द करिब तीन वर्षअघि मोटरसाइकल ग्यारेजमा काम गर्न नुवाकोटको त्रिशूली बजार पुगेका थिए। रोजगारीका लागि घरबाट टाढा पुगेका उनी श्रीमती गीता राम र करिब तीन वर्षीय छोरा दिबाँश कुमार रामसँग त्यहीँ बस्दै आएका थिए।
तर बुधबार आएको भीषण बाढीले उनीहरूको जीवन नै तहसनहस बनाइदिएको परिवारको भनाइ छ।
दुर्गानन्दका बुवा कमल रामका अनुसार बुहारी गीता र नाति दिबाँश अहिले सम्पर्कविहीन छन्। परिवारलाई उनीहरू कहाँ छन्, कस्तो अवस्थामा छन् भन्ने कुनै जानकारी छैन।
घरमा अहिले एउटै प्रश्न गुञ्जिरहेको छ—
“गीता र सानो दिबाँश कहाँ छन्?”
तीन वर्षको अबोध बालक। आमाको काख। अनि केही क्षणमै आएको त्यो विनाशकारी बाढी।
परिवारले छोरा–बुहारीको अवस्था बुझ्न निरन्तर प्रयास गरिरहेको छ। आफन्त प्रेम कुमार रामका अनुसार फोनमा दुर्गानन्द निकै आत्तिएका थिए। आफ्नै आँखाअगाडि श्रीमती र छोरालाई बाढीले बगाएको बताउँदै उनी डाको छाडेर रोइरहेका थिए।
त्रिशूली बजारमा रोजगारीका लागि पुगेका दुर्गानन्दको परिवार अहिले प्राकृतिक विपत्तिको चपेटामा परेको छ।
एकातिर श्रीमती र सानो छोराको खोजीको पीडा, अर्कोतिर आँखै अगाडि घटेको त्यो भयावह दृश्य।
बसानपट्टीमा रहेको परिवार भने अझै आशाको झिनो त्यान्द्रो समातेर बसेको छ।
सायद कतैबाट खबर आउला—
“गीता र दिबाँश भेटिए।”
त्यही एउटा खबरको प्रतीक्षामा अहिले एउटा परिवारको आँखा बाटोतिर टोलाइरहेको छ।
