समता खवर सम्बादाता ।
राजविराज, ६ मंसिर । सप्तरीमा मोबाइल चोरी गरेको आशंकामा कुटपिट गरिएका एक युवकको उपचारका क्रममा मृत्यु भएको छ । राजगढ गाउँपालिका–६ फकिरा घर भई हाल राजविराज नगरपालिका–१६ बोरिया बस्दै आएका १९ वर्षीय मुकेश यादवको शुक्रबार उपचारको क्रममा छिन्नमस्ता अस्पतालमा निधन भएको हो ।
प्रहरीका अनुसार घटना मंसिर ३ गते भएको हो । सोही दिन बोरियास्थित छिमेकी सरो कुमारी साहको मोबाइल हराएको थियो । साहले मोबाइल चोरी गरेको शंका मुकेशमाथि लगाउँदै अन्य व्यक्तिलाई साथ लिएर कुटपिट गरेको जानकारी जिल्ला प्रहरी कार्यालय सप्तरीका प्रवक्ता डिएसपी डम्बरबहादुर पुरीले दिए ।
कुटपिटबाट गम्भीर घाइते भएका यादवलाई उपचारका लागि छिन्नमस्ता अस्पताल पु¥याइएको थियो। तर, उपचारकै क्रममा उनको मृत्यु भएको प्रहरीले जनाएको छ ।
घटनापछि मोबाइल हराएको शंका लगाउने सरो कुमारी साह र उनका छिमेकी सन्तोष राउतलाई प्रहरीले नियन्त्रणमा लिएको छ । उनीहरूविरुद्ध किटानी जाहेरी सहित थप अनुसन्धान अघि बढाइएको प्रहरीको भनाइ छ ।
परिवारले मुकेशको मृत्यु मोबाइल चोरीको निराधार आरोप र सामूहिक कुटपिटका कारण भएको दाबी गरेका छन् । शव परीक्षणपछि घटनाबारे थप तथ्य आउन सक्ने बताइएको छ।
