राजविराज । सप्तरी प्रहरीले दुई जना विदेशी महिलालाई पक्राउ गरेको छ।
बलान बिहुल गाउँपालिका–४ बेल्हीस्थित चन्ही–बेल्ही सडक खण्डबाट भारततर्फ जाँदै गरेका बेला उनीहरूलाई नियन्त्रणमा लिइएको जिल्ला प्रहरी कार्यालय सप्तरीले जनाएको छ।
पक्राउ परेका मध्ये उज्बेकिस्तानकी ३९ वर्षीया फेरुजा याख्शिमुरातोवा र ३९ वर्षीया शोखिस्ता अकबारोवा रहेको प्रहरीले जनाएको छ। उनीहरू भारत मधुबनी निवासी २० वर्षीय नितिश कुमार बिन्दाले चलाएको बिआर ०७ एवाई १८७६ नम्बरको मोटरसाइकलमा सवार थिए।
शनिबार साँझ करिब ८ बजे बेल्ही प्रहरी चौकीका प्रहरी सहायक निरीक्षक उदय सिंहको कमाण्डमा खटिएको टोलीले चेकजाँच गर्ने क्रममा उनीहरूलाई पक्राउ गरेको हो।
दुवै महिलासँग पासपोर्ट नभएको र घटनाबारे थप अनुसन्धान भइरहेको प्रहरीले जनाएको छ।
